越訓係會越攰？

平時返工耗損好多精神、心力，放工後仲要聯誼或者讀書，甚至要照顧家庭，但第二朝又晨早起身返工，真係攰到人都癲～所以放假梗係訓到自然醒喇，果時可能都11、12點、甚至晏晝，但點解個身都係咁重，精神都仲係咁差……咁可能你有以下壞習慣。 1. 夜一夜都唔願訓 明知第二日放假，前一晚就玩到好夜，例如同朋友聚餐、打機、煲劇，過晒平時訓覺生理時間，搞到個人無晒睡意，仲有機會要用失眠嚟調節返個人生理時鐘，搞亂晒荷爾蒙分泌。 2. 早午餐一齊食 訓晏咗索性一次食晒兩餐，既省時又方便～不過一下子食咁多野，休息咗咁耐嘅腸胃未必適應到，所以都係先食少少，隔一陣再正式食一餐，咁腸胃就無咁易'hang'機。 3. 長期身處冷氣房 冷氣係一個偉大發明，但係凡事過多就唔好，成日涼冷氣會引致'冷氣病'*。因此放假應外出走走，讓身體出一出汗、排一排毒。 4. 飲食大亂 放假就會懶，一係就好肚餓先食，一係就狂食，再唔係就剩係食公仔麵、杯麵等無益食品，令到身體得唔到足夠營養，影響健康。 如有以上壞習慣就盡可能減少，但有時明明好乖都係越訓越攰，不能睡得甘甜，咁係因為肌肉緊。都市人經常長時間坐著工作，常常缺乏運動，令肌肉、肌筋膜不能放鬆，導致中醫所講嘅陰陽氣不能暢順交接，即經脈受阻。 要改善情況及睡眠質素，有適當心情放鬆下做嘅運動固然好，若真的不能抽空做運動，每晚可花20分鐘拉筋，使肌肉得到放鬆，特別是肩頸和後背，睡眠質素會得到提升。另外，熱氣、味重食物會令肌肉收緊，降低睡眠質素，所以少吃為妙。 希望大家都改善到睡眠質素，日日精神爽利！